E ao i le malo ona uia auala e faatino ai galuega poo le process pe afai e tatau ona toe faaola tupe a le aiga o le Palemia ua faatupe ai le siiga gasegase i Niu Sila a le ta’ita’i o le Malo le susuga Laaulialemalietoa Leuatea Polataivao Fosi Schmidt.
O se vaega lea o le finagalo o le susuga Tuilaepa L Sailele Malielegaoi le ta’ita’i o le vaega faaupufai e puipuia aiā tatau a tagata, i sana tusi i le faatonu, ua faalaua’itele ai sona finagalo ma ia fesiligia le faasalalauga mai le ofisa o le sooupu a le malo na faailoa ai le tuua o le atunuu e le Palemia ma lona faletua ona o le siiga gasegase e pei ona iai nei i Aotearoa le ta’ita’i o le malo.
Ua fesili Tuilaepa pe faapefea ona lē mafai ona faatupe e le malo le siiga gasegase ae o loo i Niu Ioka i Amerika le Sui Palemia o loo malaga i le first class i le vaalele e taugatā.
Ua faaalia ai foi e le ta’ita’i o le vaega e puipuia aiā tatau a tagata i se tulaga masalosalo, pe afai o iai se pati lona tolu poo se third party o faatupeina le tuua o le atunuu e le Palemia mo ni siaki faafoma’i i Niu Sila, e tatau ona faailoa poo ai o loo faatupeina.
O le pepa o faamatalaga faalaua’itele mai le ofisa sooupu o le malo i le amataga o le vaiaso o loo faailoa ai, o faiga faavae a le malo e agavaa le Palemia i siaki ma togafitiga faafoma’i i Niu Sila ma e faatupeina atoa e le Malo.
Peita’i ona o le tulaga o loo iai nei vaegatupe a le malo i le 25 pasene o le tala faatatau o le tupe o loo faatino ma faagaioi ai galuega a le malo, ua finagalo ai le Palemia e faatupe lava e lona aiga pasese o vaalele, le tau o togafitiga i Niu Sila ma apitaga mo le Palemia mo le taimi nei.
