Ua tuua’ia e le ta’ita’i ma le vaega faaupufai o le Faatuatua i le Atua Samoa ua Tasi le Palemia ma le Kapeneta o le malo tausi, i lo latou soli o le feagaiga e faasino i aiaiga tau malosi’aga e mafai ona oo iai le latou pule, lea e lē tatau ona latou faamaonia ni filifiliga o tofiga o Ofisa Sili o le malo.
O le toe filifilia o le Ofisa Sili o le matāgaluega o le va i fafo ma fefaataua’iga e pei ona faailoa e le ofisa sooupu a le malo i le faai’uga o le vaiaso ua mavae, o loo ilitata iai se lagona o le Faatuatua i le Atua Samoa ua Tasi.
Ua faailoa i se pepa o faamatalaga mai lea patī faaupufai o se tasi lea o matāgaluega a le malo e tāua tele ona o le tausia ai o le va faafeagai o le malo o Samoa ma isi malo i fafo, ma sa tatau ai ona taatia i se faigāmalo fou e tula’i mai i le mae’a o le palota tele na te faia le filifiliga.
E iai le talitonuga o le a faailoa i se taimi se finagalo o le Palemia tausi o ia foi o loo vaaia le matāgaluega o le va i fafo ma fefaataua’iga e tusa o le faia o le filifiliga ua toe tofia ai le faletua le afioga Peseta Noumea Simi e faauluulu iai lea auaunaga tāua a le Malo.
Ae o le malo tausi i le mae’a faatā’ape o le paea’iga lona 16 a le Palemene i le tausaga e 2021, sa filifilia ai e lena malo tausi a o Palemia le susuga Tuilaepa L Sailele Malielegaoi le Komesina o Sulufa’iga.
O le aso muamua o Aperila o le tausaga e 2021 na faatauto ai le afioga Luamanuvao Katalaina Sapolu e avea ma Komesina o Sulufa’iga a o loma le palota tele a le atunuu ia Aperila o lena lava tausaga.
O le masina foi o Iulai o le tausaga e 2021 ina ua mae’a lena palota tele ma feagai le atunuu ma tulaga le mautonu o upufai o le malo, sa tofia ai e le malo tausi i lena taimi le faauluuluga o le pulega o le suavai.
