O le faamatuu atu o vaegatupe muamua ta’i fitu selau afe tālā i ta’ita’ifono o komiti a Fono Faavae o itumalo faapalota e fitu mo le tufatufaga o le miliona lona 3 lea e mae’a i le faai’uga o le masina nei, ua ave ai ma le fautuaga malosi a le ta’ita’ifono o le komiti faatonu o le poloketi o le miliona i sui o Fono Faavae a ia itumalo aemaise o ta’ita’ifono, ia alolofa e faaalu tonu seleni i atina’e ua faamautū e faaaogā iai tupe.
O le fautuaga mai le ta’ita’ifono, o le Minisita foi o loo iai le vaaia o le poloketi ona ua lalata le vaivaa o le faigāpalota ia Aokuso, ina ne’i vae manua fuafuaga ua mae’a pasia e le komiti faafoe o le ploketi ma ta’ita’ifono faapea sui o komiti o Fono Faavae.
Ua oo atu ai nei i le 47 itumalo faapalota ua mae’a sainia maliega mo vaegatupe muamua o le miliona lona 3, totoe ai itumalo e fā lea e le’i mautinoa pe faamatuu iai seleni ona e le’i taunuu atu faatamatalaga o le su’eina o tusi ma lipoti o le faaaogāina o seleni o le miliona lona 2.
O itumalo na faasaini maliega i le Aso Lulu o lenei vaiaso o Siumu, Aana Alofi 2, Aleipata Itupa i Luga, Aana Alofi 3, Salega 2 ma Vaisigano 2.
Le tofa Lagaaia Tiaituau Tufuga o le Minisita o le malo tausi o loo ta’ita’ifono i le komiti faatonu o le poloketi miliona, ma o ia foi o le Minisita o le Matāgaluega o Tinā ma Tamaitai Atina’e o Afio’aga ma Agafesoota’i o loo iai le vaaia o lea poloketi o le atina’e o nuu ma afio’aga o itumalo faapalota e 51.
Ua faailoa e le Ofisa Sili lagolago o loo fitoitonu ma le vaaia o galuega o le poloketi, o loo tapena se talosaga i le Kapeneta e auala atu i le Matāgaluega o Tupe, pe talafeagai ona tatala se teugatupe e teu iai seleni o le a lē talaina o le tufatufaga o le miliona 3 mo itumalo o le a lē ausia le aso 30 o Iuni e faamuta ai le tausaga faaletupe o loo faagasolo nei.
O le fuafuaga e pei ona faailoa e le Ofisa Sili lagolago le tofa Unasa Viane, ina ia toe faaauau ona faamatuu vaegatupe o le poloketi pe a mae’a le faigāpalota a le atunuu.
