E lē o mālōlō lava le faimalaga ese atu o tagatānuu Niu Sila mo atumotu o le Pasefika i lenei vaitau, e asiasi i aiga pe na o ni tafaoga foi.
Ae e lē o mālōlō foi le tu’itu’i mai pea o le auaunaga a le soifua mālōlōina ina ia faamuamua pea le saogalemū pe afai o fuafua se faigāmalaga i atunuu o le Pasefika o loo pepesi ai le fiva o ponaivi poo le dengue fever.
E pei ona silafia le sasao faaafi o le faama’i o le dengue fever poo le fiva o ponaivi i atunuu o le Pasefika e pei ona lipotia o Fiti o loo maualuga ai lava le numera o tagata aafia faapea ma ē ua ma’umau ai soifua i lenei faama’i.
Ona o tulaga maualuga o le numera o tagata e aafia, o loo fautuaina e sui o le soifua mālōlōina tagata o loo fuafua e faimalaga ese atu ma Aotearoa mo atunuu e mamao aemaise le Pasefika ina ia ave le faamamafa i le faatino ai o inisiua mo malaga poo le vaega ua ta’ua o le travel insurance.
E lē gata ina ave le faamamafa i lea inisiua, a ia ave foi le faamamafa i le faatino ai o gaioiga ma tulaga uma e puipuia ai i latou mai le ono aafia i le vairusi e feavea’i e le namu o le dengue fever.
E pei ona fautuaina le ave o se vaega tapē namu o le insect repellent, ia fai lelei la’ei ia ufiufi lelei ai le tino mai le ono ‘aina e namu, ia nonofo lelei i ni fale e fai ni screens i faamalama ma faitoto’a ma isi.
O Samoa ua faamaonia mai le tapunia o a’oga ona o le faatupula’ia o le numera o tagata ma fanau ua aafia i le faama’i ma o loo galulue malosi le Matāgaluega o le Soifua Mālōlōina ma le Matāgaluega o A’oga ina ia mata’itūina lelei le saogalemū ma le malupuipuia o fanau a’oga mai le aafia i le fiva o ponaivi.
Puna o Faamatalaga: https://www.rnz.co.nz/international/pacific-news/567298/nz-travellers-urged-to-prioritise-insurance-as-dengue-outbreaks-surge-across-the-pacific
