E lē o mālōlō ai le tuuina mai pea o fautuaga ma lapata’iga a le Ofisa o le Vaaitau mo Niu Sila i uiga loulouā o le tau a o aga’i mālie atu ai le atunuu i le vaitau mālūlū.
E oo atu i le 21 fautuaga ma lapata’iga na tuuina mai e le vaaitau mo le atunuu atoa mo timuga mamafa faapea matagi malolosi, faapea le mamafa o le kiona o le a pa’ū.
Ua mata’itūina foi lōlōga faapea uila ma faititili e ono iai mo le itu i Matu o Aotearoa.
O loo iai nisi o itu o le atunuu i lalo o vaavaaiga lanu moli, o lona uiga o loo iai i se tulaga ma’ale’ale i le loulouā o le tau.
E pei ona iai faaitu o Tasman, Marlborough ma Nelson i faaitu i Saute o le atunuu; ae mo le itu i Matu o loo aofia ai Taranaki Maunga, Northern Taihape Taupō, ma le Tararua Ranges.
Ua faamauina, e oo atu lava i le 220 milimita le tetele o timuga, o le a vaaia 40 milimita e maua i totonu o le na o le itula.
Ua valoia foi le malosi o le pa’ū ai o le kiona i faaitu o Canterbury ma e ono oo atu lava i le 300 mita le maualuga o le kiona e pa’ū.
O matagi malolosi o loo valoia foi mo itu o Ueligitone, Aukilani, o Northland ma Taranaki.
O loo faaauau pea ona mata’itūina Nelson, talu mai lava tulaga pagatia na aafia ai lea faaitu i lōlōga, ma o loo maitauina le silasila toto’a o vaega o fesoasoani muamua i vaitafe.
Puna o Faamatalaga: https://www.rnz.co.nz/news/national/563005/weather-orange-rain-warnings-strong-winds-thunderstorms-forecast-as-winter-blast-arrives
