Na faalogoina i le vaveao o le aso ananafi e le to’atele o tagatānuu o North Island le mata’utia o le pāpā ai o faititili ma le emo malosi o uila, ae o lea ua tuu mai se fautuaga a le Ofisa o le Vaaitau a Niu Sila, le toe feagai o lea faaitu o le atunuu ma lapata’iga a o fautuaga e tusa ai ma tulaga o le loulouā o le tau, ma le ono vaaia ai le emo malosi o uila ae o le faalogoina ai o le pāpā o faititili i faaitu e aofia ai Northland, Auckland, Great Barrier Island, Coromandel Peninsula, ma Sisifo o Waikato ma Taranaki.
E oo atu lava i le 8 itula le umi o le taimi o le a faalogoina ma vaaia ai nei uiga loulouā o le tau, e amata atu i le aoauli nei se’ia pā’ia le vaeluaga o le po ananei.
O loo valoia e le ofisa o le vaaitau, e ono oo atu i le 25 milimita le tetele o timuga ma le telē o le suāvai e ono maua mai ai, e 40 milimita i le itulā.
Ma ua faamauina ona o le tetele o timuga e ono tula’i mai ai lōlōga tetele aemaise lava faaitu ma nofoaga maualalalo tu lalata i vaitafe ma auala e tu lalata i vanu ma e ono iai ni eleele solo e tula’i mai.
Ua lapata’ia foi le lē saogalemū ai o nisi o auala mo feoa’iga o taavale, ona o le mamafa tele o timuga.
Ua fautuaina ai foi le mamalu lautele ina ia mata’itūina lo latou saogalemu a o fetaia’i le atunuu ma tulaga loulouā o le tau.
Puna o Faamatalaga: https://www.1news.co.nz/2025/06/10/thunderstorm-watch-issued-for-parts-of-north-island/
