Talu mai le Aso Lulu ua mavae sa fautuaina ai e le Loia Sili a le Malo le Fofoga Fetalai e toe faafoi atu le taavale a le malo i le ta o le 4 i le afiafi, e lē o iloa poo ua faatino lea tulaga.
Ae o le tusi a le Loia Sili na tuuina atu i le Fofoga Fetalai i le Aso Lulu lava na te’a nei, o loo faailoa atu ai i le susuga Papalii Li’o Oloipola Ta’eu Masipa’u o le Aso Lulu lava lea e fono ai le vaega o gafa ma le vaaia o taavale uma a le malo poo le Government Vehicle Task Force e iloilo se isi gaioiga e faatino.
Ua aumai se finagalo o le Fofoga Fetalai ina ua maua iai se fesoota’iga i le Aso Sa ananafi i Samoa ma faailoa ai e le Fofoga Fetalai ua loka nei le taavale sa ia faaaogāina ma o loo tu i le ofisa o le fono i Mulinuu.
Ua ia faailoa mai foi e na te lē o toe faaaogāina ae ua faaaogā lava lana taavale.
O le tusi a le Loia Sili na toe faamanino ai vaega sa felautoa’i ai ma se finagalo o le Fofoga Fetalai i tulafono tumau ma tulafono a le Palemene sa faavae ai sona finagalo e maua lava lona totogi ma faaaogā le taavale pe a faatā’ape le Palemene e faapea foi i le Sui Fofoga Fetalai.
Peita’i sa naunau le Fofoga Fetalai i lea fetusiaiga muamua ma le Loia Sili e na te lē talia le faamalamalamaga na avatu se’i vaganā ua avatu e le Loia Sili se finagalo faaletulafono o se loia mai fafo.
O le Aso Lulu na te’a nei na tuuina atu ai lea finagalo faaletulafono tuto’atasi mai se loia i Niu Sila o se King Counsel poo se KC ma o loo lagolagoina ai le faamalamalamaga a le Loia Sili sa ave i le Fofoga Fetalai.
I le avanoa sa talanoa atu ai i le Fofoga Fetalai i le Aso Sa sa ia faailoa ai o loo maua pea lona totogi ae o le Sui Fofoga Fetalai ua iai le faaletonu.
