O le masina o Iulai o le tausaga na te’a nei na amata faamamalu ai le siitaga o le totogi pito maualalo poo le minimum wage mai le 3 tālā sa iai, i le 4 tālā i le itula.

Peita’i ua faailoa e le Iuni a tagata faigaluega i lo tatou atunuu le Samoa First Union i se faasalalauga i lana upega tafa’ilagi, ua oo atu ni faaseā mai nisi o tagata faigaluega i se pisinisi tuma’oti o se faleoloa, ma faailoa atu ai e lē o totogia i latou i le $4 tālā i le itula ae ua na’o le $3.50 sene.

Ua faailoa e lea auaunaga tuma’oti o se solitulafono le lē usita’ia o le totogi pito maualalo e totogi ai tagata faigaluega i pisinisi tuma’oti le private sector.

O le masina o Iulai o le tausaga nei o le a faamamalu ai le siitaga o le totogi pito maualalo lea o le a oo atu ai i le $4 tālā 84 sene i le itula.

Ua faaalia e le Samoa First Union i lana faasalalauga e lē gata e solitulafono le lē tuuina atu o le totogi pito maualalo ua faamautū ma pasia e le Malo, ae o se solitulafono foi le taumafai o se tagata e ana se galuega e faamata’u se tagata faigaluega pe a fesiligia le amiotonu e faatatau i lona totogi.

O loo aiaia le aiātatau o soo se tagata faigaluega e avea ai ma sui lesitala o le Samoa First Union, o se auaunaga tuma’oti e mafai ona fesoasoani i mafatiaga o tagata faigaluega.