Ua ave le tuualalo ma le fautuaga a le Komesina o faigāpalota i patī faaupufai ma sui tauva ua alu faasalalauga o a latou faalauiloa o faatosina o le palota ina ia taofi, ona e faato’ā amata lea laasaga o tapenaga o le palota tele i le aso 14 o Iulai ae mae’a i le Aso Sa 24 o le masina lava o Iulai.

O le faatalanoaga a le polokalame o le Fofogamua a le Radio Samoa ma le Komesina o faigāpalota sa fesiligia ai i sona finagalo i lea tulaga, ina ua aumai faalaua’itele i le Aso Sa le faasilasilaga ua faailoa ai le piliota o faatosina ma e tatau ona usita’ia e sui tauva ma vaega faaupufai.

Ua faailoa ai foi e le Komesina o se solitulafono le faia o ni faasalalauga ma ni faalauiloa faatosina o le palota ae le’i faagaioia le faauluina o sui faatutū, lea e amata lesitala ma faaulu i le Aso Gafua o le vaiaso a sau le aso 7 o Iulai.

Se finagalo o le Komesina o faigāpalota afioga Toleafoa Tuiafelolo Alexander John Stanley i le faatalanoaga ma le tofā Fofogamua Seumanu o le Radio Samoa.

Ua savali i le 3 vaiaso talu ona molimauina faalauiloa ma faasalalauga a sui faatutū ma nisi o patī faaupufai, e aofia ai ma faalauiloa o anavatau.

O nisi o vaega faaupufai o loo tapena ia tulaga e le’i oo i le taimi e faalauiloa ai.

Ua iai foi laupapa o faalauiloa ua molimauina ua faatutū i tafāala i nisi o nuu ma afio’aga.

O ia tulaga uma e faato’ā mafai ona faatino i le piliota ua atofaina e pei ona amata i le aso 14 ae mae’a i le 24 o Iulai.