Ua ave le lapataiga ma le fautuaga a le Komesina o leoleo i le taitai o le itu faaupufai o loo agaia le faigamalo le susuga Tuilaepa L Sailele Malielegaoi, e faaeteete le soona fai o ni faamatalaga i luga o auala o faasalalauga ma fesootaiga, e ono faamanu’alia ai ni finagalo o nisi o le mamalu o le atunuu, pe faatupu ai se vevesi e ono tulai mai i totonu o le atunuu, ma ono lamatia ai lona saogalemu.

O lea lapataiga mai le Komesina e ala i lana tusi, na logoina ai Tuilaepa i le mae’a o le iloiloga ma faia ai le faaiuga o le a toe aveesea mai le Malu o le Malo sa vaaia lona saogalemu, ona ua faamautu i le iloiloga e leai se tulaga o lamatia ai lona saogalemu.

O le tusi foi lea ua faailoa atu ai e le Komesina le susuga Auapaau Logoitino Filipo i le taitai o le vaega e puipuia aiātatau a tagata, e leai se faiga faavae poo se Tulafono e tuuina atu ai se leoleo na te leoleoina se tasi sa avea ma Palemia poo se tasi foi sa avea mumua ma Ao o le Malo.

Ua fautuaina ai le susuga Tuilaepa afai e le faamalieina i le faaiuga a le matagaluega, e fautuaina le sailia o se sui mai kamupani sikulati i totonu o le atunuu na te faatinoina lea galuega.