I le faamautū ai i Tuasivi o galuega a le Matāgaluega o Leoleo, Falepuipui ma le Toefuata’ina auā le tautuaina o le motu tele i Salafai, o lea ua talia e le malo o Ausetalia se molimana’o na momoli iai e le matāgaluega e ala i le tatou malo, e fia fausia se nofoaga i Tuasivi lava, e faatino ai auaunaga fesoasoani a leoleo e faapitoa i ni solitulafono poo ni faalavelave e tula’i mai i gataifale o Savaii.
O le talia ai e lea malo o le fausia o se nofoaga mo ia galuega fesoasoani a leoleo, ua amata faatino ai ma galuega ina ua mae’a le sauniga na suaina ai le eleele ma faapaia le nofoaga o le a fausia ai se fale e avea ma nofoaga autū o ia galuega fesoasoani.
Ua faailoa e le Minisita o leoleo, falepuipui ma le toe fuata’ina le afioga Faualo Harry Jeffrey Schuster i lea sauniga, o lea nofoaga o le a iai ma potu e mafai ona faamautū ai tagata e to’avalu, o se nofoaga e faia ai galuega, o se umukuka, vaega e faamautū iai vaaafi a leoleo, ma le nofoaga e tutū ai taavale a malu o le malo o le a galulue ai.
Ua momoli ai le faafetai a le minisita i le sui o le Malo o Ausetalia i Samoa ona o le taliaina o le mana’oga o leoleo sa faaauala atu i le sui o le fitafita o le puipuiga o Ausetalia sa galue i Samoa i le tausaga e 2023 o ia lea o Lutenant Commander Jared Williams.
