O le Aso Lulu o lenei vaiaso na faamautū ai i le faitauga aloa’ia o le faigāpalota o loo faagasolo le toe filifilia o nisi o sui usufono sinia ma pito tele tausaga o seei i tofi faipule o le Palemene.
O le susuga Tuilaepa Lupesoliai Sailele Malielegaoi le ta’ita’i o le vaega e puipuia aiā tatau a tagata ua manumālō i le filifiliga a le itumalo o Lepa i le aofa’iga e 685 palota na ia maua, ae pito iai le sui tauva o le Faatuatua i le Atua Samoa ua Tasi o Tupua John Tupua e 106 palota na ia maua.
O le afioga i le Sa’ofaapito le afioga Fiame Naomi Mataafa ua toe seei i le nofoa o le itumalo o Lotofaga na ia maua palota e 486, pito iai palota e 247 na maua e le tasi o sui tauva tama’ita’i sa tauva i le fu’a a le Faatuatua i le Atua Samoa ua Tasi le afioga Fuimapoao Taliilagi Beth Onesemo, ma le isi sui tauva o lea lava patī faaupufai le tofa Fiaola Iosua Lole na ia maua palota e 226.
O le susuga Tuilaepa na mua’i ulufale i upufai o le malo i le tofi faipule o Lepa i le tausaga e 1981 ma ua savali nei i le 44 tausaga o tusi aao pea iai lona itumalo e na te tauave le tofi faipule o le Palemene.
O le afioga Fiame Naomi Mataafa na ulua’i ulufale i upufai o le malo o Samoa i le tausaga e 1985, ma ua 40 tausaga o lotolotoi pea i upufai o le malo.
O ia tamalii ma faipule pito sinia e le’i motusia lava a la tautua i nofoa’iga faapalemene talu ona ulufale atu i faalagamaea o upufai o le malo o Samoa.
