Ua iai le isi ola ua fano e māfua i āuga o le faama’i o le fiva o ponaivi e pei ona lipotia ai e le nusipepa o le Samoa Observer, peita’i talu mai le isi maliu o se tasi o le fanau i le amataga o lenei vaiaso i āuga lava o lea faama’i e le’i tuuina mai i se tulaga aloa’ia se faamatalaga mai le matāgaluega o le soifua mālōlōina.

O le fano o le ola o le tamaitiiti e 9 tausaga le matua i le taeao o le Aso Tofi ananafi i Samoa ua siitia ai i le to’afā fanau ua fano ola mai le fiva o ponaivi talu mai le masina amata o le tausaga nei.

O le falema’i i Faleolo e pei ona faailoa e se tasi o le aiga, na sulufa’i iai mātua o le tamaitiiti iva tausaga le matua ua fano le ola mo se lavea’i ma maliu ai a o tapena e auina atu i le maota gasegase i Motootua.

Ua fautuaina mātua e le matāgaluega o le soifua mālōlōina ina ia vave vaai se foma’i pe a vaaia ni āuga o le faama’i o loo pesi nei, ae lē o le ave i se taulasea poo foma’i Samoa.