A o tumutumu ai pea le ofisa autū o faigāpalota i Mulinuu i le to’atele o tagata agavaa e lesitala mo le palota, ua faailoa e le Komesina o faigāpalota nisi o nofoaga o le a amata faaaogā e amata atu i le vaiaso nei mo le lesitalaina o le aupalota.
O le faletaalo o le GYM 1 i Tuanaimato mo nuu ma afio’aga i Sisifo o Upolu, ae o le fogafale i lalo o le maota o Tuiatua Tupua Tamasese Efi poo le TATTE i Sogi mo nuu ma afio’aga i Sasa’e o Upolu.
Ua faailoa ia nofoaga faaopoopo a o faagasolo ai mo le vaiaso mulimuli lenei le galuega i Savaii lea ua amata i le Aso Gafua o lenei vaiaso fou i le itumalo o Falealupo, ma faasolo atu ai i le itumalo faapalota o Alataua i Sisifo, o Salega 1, Salega 2, ae taualuga atu i itumalo faapalota o Palauli 1 ma Palauli 2.
O le faamanatu a le ofisa o le komisi o faigāpalota i tagata uma e aga’i e lesitala, ia tauaao atu pepa fanau, ma ID o iai se ata e faamaonia ai lou tagata.
E mana’omia foi le tauaao atu o le pepa faamaonia o se suafa matai e faamautū ai ua lesitala faaletulafono le matai, ma pepa o fanua mo tagata lesitala ua nofomau i nuu ua faatau ai le fanua e umia sa’oloto.
O le aso 27 o le masina lenei o Iuni e mae’a ai le galuega o le lesitalaina o tagata palota.
