E 23 tausaga o se tama’ita’i ua faasala nei i le falepuipui, ina ua faamaonia moliaga o lona taumafai lea e aumai faananā i totonu o Niu Sila, o ni fuala’au faasāina o le methamphetamine.
Ta’ua i se faamatalaga mai le Ofisa o Tiute e tauala mai i luga o upega tafa’ilagi – le social media, na taumafai lea tama’ita’i e aumai nei pauta faasāina mai se tasi o faigāmalaga i luga o le ‘ea, mai Kanata i le amataga o lenei tausaga, ma o lea ua oo mai le faai’uga a le faamasinoga, e falepuipui o ia mo le 6 tausaga.
I faamatalaga, i le taunuu ai o le tama’ita’i, na su’esu’eina ai loa e le vaega o tiute ana meatotino poo lana ato na malaga mai ma ia i Niu Sila, i le aso 26 o Mati 2025, i lona faato’ā taunuu mai.
Ma o ii na maua ai loa e le au su’esu’e a le vaega o tiute le 14 o afīfī o loo nanā ai i totonu le pauta faasāina o le methamphetamine, faamauina pe lata lava i le $4.55 miliona pea faatau atu i le lautele ma le maketi.
Ta’ua e le faatonu o le vaega o su’esu’e a le Ofisa o Tiute, ia Simon Jamieson, ua tatau lava ia i latou o loo mafaufau e aumai faananā nei pauta, e tusa poo le ā le nanā e fai ai le aumaia o fualaau faasāina, e maua lava i latou, ma e leai foi se ‘alofaga i le tulafono ma le faasalaga e oo iai pe a maua.
O le faafetai a lenei sui sinia o le Ofisa o Tiute, o le mafai ona taofia o le ofi mai i totonu o le atunuu o nei fualaau faasāina, ma e tusa ai ma faamaumauga, ana fai ae oo i le lautele lenei pauta, e oo atu lava i le $15.5 miliona le tauaofai o aafiaga e oo iai le atunuu.
Puna o Faamatalaga: https://www.facebook.com/share/p/19uMfhFkfr/
