E 11 masina ua faasala ai nei i le falepuipui le alii o Richard Trevor Sivell, 43 tausaga le matua, ina ua faamaonia ona moliaga i lona faia o faaupuga taufaamata’u e na te faaoo le oti i lē sa avea ma Palemia le tama’ita’i o Jacinda Ardern.
Faamauina na amata faatino e le alii o Richard ia gaioiga taufaamata’u i le va o le masina o Novema o le tausaga 2021 aga’i i le masina o Ianuari 2022, o le vaitaimi a o tetele le sasao o le faama’i o le Koviti-19 a o le’i alia’e foi se tasi o tetee i le Palemene.
Ta’ua e lua foi isi moliaga na molia ai lea alii, o le faalavelave i galuega faatino a leoleo, e pei ona lē usita’ia ai e lea alii tulaga o le aga’i atu ai o leoleo – e faapea na musu Richard e sau i fafo ma lana caravan, ma le lē tuuina atu o le pin e tatala ai lana telefoni.
Ma lona lē usita’ia ai o aiaiga i le tatala ai o ia i tua; e faamauina sa sola lea alii ma lafi mai leoleo mo le oo atu i le 20 masina.
I le matāupu na māua i su’esu’ega e tele lava faamaumauga na faamauina ai le matua’i tele o faamatalaga taufaamata’u a lenei alii na fai faasaga ia Ardern e faaaogā ai luga o upega tafa’ilagi.
Ma e faapea e fai lava sina mamafa o faaupuga ma faamatalaga a Richard na fai e pei ona ta’ua i se tasi o ana tusitusiga, lona fasiotia ai o le tama’ita’i o Jacinda poo le execute i le gagana Peretania ma faaupuga e pei o le mana’o e faalogo ae gau le ua o Ardern se’i tulou!
O se gagana e matua’i lē tautamalii lava.
Ina ua tuu atu le avanoa ia Richard e fai ai sana faamatalaga a o le’i tuuina mai le faai’uga a le faamasino e ala i se video link mai le falepuipui, na ta’ua ai e le alii ona lagona o le mata’u ma le fefe i lona iai i le falepuipui, ma ia ta’utino ai e na te le’i faia faatasi ni faamatalaga taufaamata’u faasaga ia Jacinda.
Ma ia faailoa o loo taofia ma molia sese e leoleo o ia.
Ua tuua’ia o loo taumafai leoleo ma le to’atele e faaleaga o ia ma loka.
Ae ui i se augani a lea alii, na faailo e faamasino o faamaumauga ua iai nei o loo faaalia ai e lē na o le tasi se taimi na faatino ai e Richard faamatalaga ma na fai aga’i i se sui taualoa i le atunuu o se sui a Faipule ae o se tama’ita’i Palemia i lea vaitau.
Faaalia e le faamasino, talu ai e lē o vaaia ni foliga salamō o Richard o lea na ia faia ai le faai’uga e falepuipui mo le 11 masina e aunoa ma ni tuutuuga.
Puna o Faamatalaga: https://www.nzherald.co.nz/nz/richard-sivell-jailed-for-death-threats-against-former-pm-jacinda-ardern/PB6R5A7CKVCVVAMEOCRXFD5HTY/
