Ua faasala nei ni tagatānuu Saina se to’atolu i le falepuipui ina ua faamaonia o latou moliaga o le taufaavalea ma le taufaasese e maua ai le tele o mea aogā ma tupe i le masina o Oketopa i le tausaga na te’a nei.  

O tagatānuu Saina ua faafalepuipui nei, o Baodi Wu 59 tausaga, Huanyan Chen 54 tausaga, ma Guoli Liang 51 tausaga.  

Ma i tala’aga o lenei matāupu, e tolu lelei vaiaso o faasolo gaioiga a i latou nei, faapea sa o latou faamatala i tagata ua aafia, o loo latou feagai ma ma’i ma e moomia se fesoasoani e ala i le tuu o a latou meatōtino i totonu o se ato, ae fai ai ni gaioiga faataulasea ma le lē iloa e nai tagata ua fesuia’i ai a latou meatotino tāua ma ave faananā.  

Na faamauina i lipoti mai le Newstalkzb e to’alima lelei tinā o ni tagatānuu Saina mai Aukilani nei ma Kalaiesitete e 53 tausaga ma le 82 tausaga le matutua, na aafia i faiga faalēalofa a nei tagata.  

E sili atu lava ma le $100,000 le aofa’iga o tupe ma meatotino tāua na ave faagaoi e nei tagata e tauala atu i a latou gaioiga faasolitulafono.

Ae faamauina i le mae’a faia o gaioiga a i latou e to’atolu nei, na faanatinati lava ona taumafai e malaga ese atu ma Niu Sila, peita’i e le’i manuia.  

Na taofia ma saisai mai e leoleo mai le malaevaalele a o le’i aga’i ese ma le atunuu.

Ua ta’ua foi le maua ma taofia ai e leoleo le tele o meatotino tāua, e pei o filifili auro, o le tele o tupe, ma le oo atu i le $78,000 o tupe Saina ua uma ona faaliliu.  

O le to’alua o i latou nei ua faasala nei i le to’ese mo le 2 tausaga ma le 3 masina, ma le tuutuuga e mafai ona agavaa mo le palola pe a mae’a ona tuli le tasivaetolu o la faasalaga.

Ae o le isi e to’atolu ai, o le a faasala mo le 19 ma le ‘afa masina.

Ua iai foi le aiaiga o le a tipoti i latou nei pe a mae’a ona tuli o latou faasalaga.

Puna o Faamatalaga: https://www.newstalkzb.co.nz/news/crime/chinese-visitors-baodi-wu-huanyan-chen-and-guoli-liang-sentenced-for-targeting-auckland-christchurch-residents-in-blessing-scam/