E 41 tausaga le matua o se alii sa galue o se leoleopo mo le ofisa o le pulega o galuega o taimi o faalavelave faafuase’i poo le Disaster Management Office le D.M.O. ina ua faamaonia e le Faamasinoga Maualuga lona ioeina o solitulafono o lona umia ma faaaogā nakoti poo fualaau faasāina o le ‘aisa ma le maruana.
O Felix Otto o Vailuutai sa galue i le ofisa o le D.M.O. i Tuanaimato ae o le aso 5 o Ianuari o le tausaga nei na aga’i ai i lana galuega i lana taavale.
Peita’i sa maua atu i le galuega asiasi a leoleo i le nofoaga i Tuanaimato i le aoauli o le aso lea o loo tu le taavale a lē ua molia i autafa o se vaega o le alatele lata i le lotoā o le ofisa o galuega lavea’i i taimi o faalavelave faafuase’i matuiā le NEOC ma iloa atu o loo moe le tagata i totonu ae o loo tatala le vaega i tua poo le faitoto’a o le keli.
Na aga’i iai ni leoleo se to’alua ma siaki ma maua ai Felix o loo fai sana mālōlōga.
Na faia le siaki o le taavale ma maua ai maruana ma le ‘aisa ma ave loa i le ofisa o leoleo lē ua molia mo nisi o su’esu’ega atili.
Na faailoa e Felix i leoleo sa alu i le maketi o i’a i Savalalo ma faatau mai ai ana nakoti i se tagata e masani ai, o lona foi atu e faigaluega na ia lē mafai ai ona ulufale i le lotoā o loo galue ai ona ua loka le faitoto’a, o le mafua’aga lea na faatū ai lana taavale i autafa o le alatele ma fai ai sana mālōlōga.
E 19 masina ua faasala ai Felix Otto i le falepuipui.
