Ua falepuipui alii e toalua mai le afioaga o Afega na la faia sauaga e aafia ai feusuaiga fai faamalosi i se tamaitai.

O Fetuao Fata Roketi 23 tausaga o Afega e 12 tausaga i le falepuipui le faasalaga ma Faaiuaso Piula Tuivanu 25 tausaga le matua o Afega ma Sataua ua faasala e le Faamasinoga Maualuga i le 6 tausaga i le falepuipui ina ua faamaonia moliaga o sauaga e aafia ai feusuaiga fai faamalosi.

O loo taofia le faasalalauina o le suafa o lē na aafia i lenei mataupu, atoa ai ma se faamatalaga e faatatau ia te ia.

O le mataupu na tulai mai ia Aperila o le tausaga ua mavae.

I faamaumauga o mea moni sa maua mai le itu a leoleo o loo faamauina ai, na uluai molia ia alii i moliaga o le faiaiga faamalosi, sa molia taitasi i laua i moliaga o le faaoolima matagā.

O le alii o Fetuao sa molia foi i le moliaga o sauaga e aafia ai feusuaiga fai faamalosi, ae o Faaiuaso sa molia i le moliaga o fesootaiga e aafia ai gaioiga faafeusuaiga.

O le alii foi o Fetuao e iai ona moliaga muamua, ae o ia foi o lē sa faia le la faigauo ma lē ua aafia muamua mo le 3 masina, ae o Faaiuaso faato’ā tulai lea i le Faamasinoga.

O le aso 5 o Iuni 2023 na ioeina faatasi ai e i laua ia o la moliaga (join charge of sexual violation by rape), ae o le aso 10 o Iuni na faaui ese ai lo la tetee i le moliaga sa molia faatasi ai i laua.

Na faailoa e le alii Faamasino ia Vui Clarence Nelson o le moliaga o le faia o feusuaiga faamalosi o lona faasalaga maualuga e soloatoa i le falepuipui, ae i le tulafono a lo tatou atunuu ua faatulai mai ai se fuafuaga faataatia (sentencing plans) e pei ona faavae mai i le faai’uga a le faamasinoga apili i le mataupu i le va o leoleo ma Key.

O le laulau a le faamasinoga i lea mataupu na latou faaveina ai ni fua faataatia se fā.

* P1: 8 tausaga seia oo atu i le 10 tausaga e falepuipui ai

* P2: 9 – 15 tausaga e falepuipui ai

* P3: 14 – 20 tausaga e falepuipui ai

* P4: 19 tausaga – soloatoa (life imprisonment)

Na ta’ua e Vui o le galuega a le Faamasinoga o le tilotilo lea i le mau ma le solitulafono i lona mamafa ona tagai lea poo lē fea le fua faatatau e talafeagai ai.

O le mataupu sa tulai mai i le po o le aso 10 o Aperila o le tausaga ua mavae, o lē na aafia sa agai e fai lana faatau i le faleoloa.

O le taimi lea o loo faia le inuga a ni tauleleʻa i tafāala a o agai atu lē na aafia sa agai ane iai Fetuao ma fesiligia.

O le toe foi mai ai o lē na aafia na faatauanau ai loa e Fetuao la te o e momoli ia i lona aiga ona o loo taupulepule taulelea i luma atu e iai le mea e fai ia te ia, ma o loo iai le agaese i le tasi o taulelea ia.

Sa fefe lē na aafia ma i’u ina malie ai e agai ma lē na molia e momoli o ia, o lea tulaga na i’u ai ina faatauanau ma faasese e lē ua molia lē na aafia ma afe ai i se fale ma faatino ai loa le solitulafono fai faatasi e i laua ua faasala nei e le faamasinoga.

I le faai’uga a le Faamasinoga ia Fetuao sa faaaogāina ai le P3 o le fua faatatau faataatia o faasalaga lea amata mai le 15 tausaga i le falepuipui.

E manatu le Faamasinoga i mea na tutupu e eseese ai faatinoga sa faia e i laua o lea na taunuu ai i le faai’uga e talafeagai le tapena eseese o faasalaga o i laua.

E lē gata i lea o le alii o Fetuao o ia o se tagata sa molia foi i moliaga ia muamua sa faatino i se teineitiiti.

O ia foi na ta’ita’iina le faatinoga o le solitulafono fai toalua.

Ua maua foi o loo tālia se faai’uga a le Faamasinoga i le isi foi solitulafono ae o lea ua toe maua foi i le isi solitulafono…ua manino ai i le Faamasinoga e foliga mai e lē ano i le tulafono.

O lea na faaopoopo ai le isi lua tausaga i le faasalaga amata.

E tasi mo le moliaga muamua i le 2019 ua mae’a faamaonia e le faamasinoga.

E tasi mo le toe molia a o tālia se faai’uga a le Faamasinoga Faaitumalo ia te ia i le isi foi moliaga.

Ona amata ai lea o le faasalaga a le Faamasinoga i le 17 tausaga.

Sa toese le 6 masina mai le fua amata ina ua faatino le ifoga i le aiga o lē na aafia.

Na toese le isi 6 masina ina ua faatino lana sala i le nuu.

O le isi itu o le vave ona ioe e le alii o moliaga ua lē gata ua faasao ai le taimi o le Faamasinoga ae ua faasaoina mai ai foi lē sa aafia mai le tau toe tulai i le Faamasinoga ma toe tomanatu i mea sa faia ia te ia o se mafatiaga tele lea.

E fā tausaga masani e toese mai e le Faamasinoga o le kuata lea o le faasalaga amata na totoe, tuufaatasi lea ma le ta’i ono masina ua toese e tusa ma le 5 tausaga na toese mai i le faasalaga amata lea e 17 tausaga.

Ua faamaonia ai le solitulafono a Fetuao ma e falepuipui mo le 12 tausaga i Tanumalala.

Mo Faaiuaso na faaaogā e le Faamasinoga le P2 o le fua faatatau faataatia mo faasalaga ae i le pito lava i lalo o le fua faatatau lea e amata i le 10 tausaga.

Na toese mai le 6 masina mo le ta’uleleia o lona tagata ma o se taimi muamua lenei ua solitulafono ai.

E ono masina na toese mai le faasalaga amata ona o le ifoga na faatino aemaise le faateʻa ese ai e le nuu ma na ta’ua e le Alii Faamasino e ui e ogaoga lea faasalaga ae o se mea amiotonu ua faia.

E tasi le tausaga ua toese mai le faasalaga amata na totoe ai le 8 tausaga, ona toese mai lea o le kuata o le faaslaga o totoe e pei ona masani ai lea e tusa ma le 2 tausaga, ma totoe ai le 6 tausaga o le faasalaga o Faaiuaso i le falepuipui.

Ua faailoa foi e le alii Faamasino o le mae’a ai o faasalaga o i laua ia o le a faamauina ai loa o la suafa i le lesitala mo i latou ua faamaonia le solitulafono o le faia o feusuaiga fai faamalosi (sex offenders registry).