Ua manino ma mautū nei le aso 16 o Setema le Aso Lua o le vaiaso a sau, e usuia ai le ulua’i fonotaga a le paea’iga fou faapalemene lona 18 o le Malo Tuto’atasi o Samoa ina ua mae’a ai le palota tele i le Aso Faraile ua mavae.
O le afiafi o le Aso Gafua o lenei vaiaso na aumai faalaua’itele ai le poloa’iga a le afioga i le Ao o le Malo, afioga Tuimalealiifano Vaaleto’a Sualauvi II na faailoa ai lea tauaofiaga e faia i le fale taalo o le Multi-Purpose Gym i Tuanaimato.
O galuega o loo faagasolo o le fausia o le maota e avea ma ofisa autū o le fono aoao faitulafono i Mulinuu le mafua’aga ua lē tauaofia ai lea fonotaga muamua i le Maota Fono i Tiafau.
E pei ona silafia o fonotaga faai’u a le paea’iga 17 a le Palemene ia Ianuari faasolo mai ia Me o le tausaga sa usuia i le maota mo fonotaga tetele i le maota o Tuiatua Tupua Tamasese Efi i Sogi e māfua ona o lea galuega o loo faagasolo.
O le ulua’i tauaofiaga a le paea’iga 18 a le Palemene i le Aso Lua a sau o le a faatauto ai ma sui usufono filifilia uma o itumalo faapalota e 51.
O le fonotaga muamua foi lea o le a faailoa ai le itu faaupufai o le Faatuatua i le Atua Samoa ua Tasi ua avea ma faigamalo fou i le mae’a o le faigāpalota, lea o le a faailoa ai foi ma le Palemia filifilia ma lana auvaa o minisita o le Kapeneta.
O lea foi tauaofiaga o le a filifilia ai ma le Fofoga Fetalai o le paea’iga faapalemene 18.
O le vaiaso lenei o loo tapena ai ma sui sa tauva o tuto’atasi ua manumālō pe fia lagolago i se vaega faaupufai a o le’i faatautoina sui usufono uma, ia poo le tauave pea o le tulaga tuto’atasi mo le paea’iga lima tausaga o sosoo ai nei.
O le paea’iga 18 foi ua mautinoa ua na o le lua vaega faaupufai e aloa’ia i totonu o galuega faapalemene ona ua ausia le aofa’iga e to’avalu ma sili atu o sui lagolago ua na o le patī faaupufai e puipuia aiā tatau a tagata o le a avea ma Itu Agai e 14 nofoa, ma le itu faaupufai a le malo le Faatuatua i le Atua Samoa ua Tasi.
O le vaega faaupufai o le Samoa ua Potopoto ua na o le 3 nofoa ma e lē ausia le aofa’iga e valu o nofoa e aloa’ia ai o se patī faaupufai i totonu o le Palemene.
O le a faalupe sui faipule e to’atolu o lea pati faaupufai o sui tuto’atasi.
O tua mai o le Palemene e aloa’ia ai ni patī faaupufai e lē atoa le valu o nofoa.
