A o feagai pea le atunuu ma tulaga loulouā o le tau i lenei vaitau mālūlū, e lē tau faailo tulaga pagatia ua fetaia’i ma le tele o faaitu i lōlōga tetele ma timuga mamafa.
Ae o lea ua faaopoopo mai le malolosi o matagi, e pei ona lipotia mai ai i le taeao nei le faitau selau o aiga ua motusia le eletise.
E tusa ai ma lipoti mai le leitio faavaomalo a Niu Sila, na ta’ua ai le mata’utia o faiga a le matagi, e pei ona faaleagaina ai le tele o laau, o pou mōlī ma uaea eletise i le tele o vaega i Mātū o le atunuu.
Faamauina le faaleagaina ai foi o le taualuga poo le fā’alo o le fale o se tasi aiga, o se loli (truck) ma se trailer na featofa’i solo ona o le malosi tele o matagi i faaitu e lata ane i Dargaville.
Faamanino i lipoti, e tusa ai ma tulaga o le eletise, na oo atu lelei i le 8000 aiga ma nofoaga na motusia faafuase’i le eletise, ae peita’i e oo mai i le taeao o le asō ua tuuitiitia i le lata i le 500.
E to’atele i latou e aumau i Tinopai, o se nofoaga e tu lata i le sami i itu o le uafu o Kaipara.
Faailoa e le Northpower, o loo latou galulue e toe faaola uma lea faaitu ma ia mae’a atu lenei Aso Faraile ua maua uma le eletise.
Pau le vaega o loo mata’itū o foliga o le tau, ma pau le tatalo ia tumau ai pea foliga lelei o le tau mo lenei aso.
Puna o Faamatalaga: https://www.rnz.co.nz/news/national/567263/weather-hundreds-of-properties-without-power-after-severe-gales-in-northland
