O se matāti’a ua patipatia e le to’atele o sui o le soifua mālōlōina, le maua ai e le maota gasegase i Kalaiesitete, o se masini poo se scanner e mata’itūina, ma iloa ai tulaga o le soifua mālōlōina o tagata gasegase.
Ua faaalia foi, o se tala faasolopito lea i le Atu Polenisia ma le Atu Pasefika, poo le Australasia, ona o se taimi muamua lea ua maua ai se ituaiga masini faapenei.
E ui ua tele masini poo scanners ua fausia ma maua mo le mata’itūina o le soifua mālōlōina o gasegase, peita’i ua faamauina, o lenei ituaiga masina sili atu lona faatonutonuina ma le maua atoatoa ai o ata manino ma le lelei i le taimi e su’esu’eina ai se ma’i a se tagata o loo aga’i atu mo siaki e faaaogā ai lenei masini.
Ta’ua i lipoti, o le tasi o vaega ua faamaonia e tusa ai ma lenei masini, e faapea o le a vave ai ona maua e foma’i faapitoa gasegase o loo fetaia’i ma le to’atele o loo aga’i atu mo siaki, na i lo o le taimi muamua.
O le tala fiafia lea mo le to’atele o sui o le falema’i i Kalaiesitete, ma o le a atoatoa foi le galuega i le taumafai e mata’itū gasegase poo ma’i o loo feagai ma tagata lautele ma o le a mafai foi ona faatino le tele o sa’ili’iliga e faaaogā ai lea ituaiga masini.