E to’atele tagata na lē mafai ona aga’i ese ma le vaa la’upasese o le Aratere i le po anapo ina ua pē faafuase’i le vaa, a o aga’i atu ai le faimalaga mai Picton mo Ueligitone.
I lipoti mai le leitio faavaomalo a Niu Sila na māua ai, na aga’i ese le vaa la’upasese mai Picton i le 8.50 i le po anapo, na faate’ia le pasese ma le ‘auvaa i le pē faafuase’i o le vaa.
Na ta’ua faato’ā toe ola le vaa, i le itula e tasi i le vaveao o le taeao nei, ina ua mae’a ai ni galuega faatino mo le tau faaolaina o lea vaa.
Na faaauau lava le faigāmalaga mo Ueligitone, ma ona o tulaga faaletonu na iai le vaa, na suia ai loa le taimi e taunuu ai le vaa o le Aratere i Ueligitone i le itula e 5 i le vaveao.
Lona uiga a faatulaga le taimi ma itula na tula’i mai ai lea faafitauli ma le taimi na taunuu ai le vaa i Ueligitone e 8 lelei itula.
Ona o tulaga faaletonu o le vaa la’upasese, e le’i faataunuuina faigāmalaga na fuafua mo le itula e 6 i le taeao.
Ta’ua e se sooupu e le’i mafai ona faaauauina faigāmalaga ae se’i taga’i e faatino iloiloga i le vaa.
Faamauina foi le tele o malaga ua toe suia taimi o faigāmalaga, o pasese foi ua tuuina atu ai le fesoasoani mo le fetuuna’iga o a latou faigāmalaga e aunoa ma se totogi.
Ua tuuina mai foi se faamaluluuga a le kamupani i aafiaga ua iai nei malaga a le to’atele ona o lea faaletonu.
Puna o Faamatalaga: https://www.rnz.co.nz/news/national/563846/aratere-passengers-stuck-on-board-for-hours-because-of-electrical-fault
