O le Aso Lua o lenei vaiaso na amata faasolo ai se solo tetee foma’i sinia ma foma’i nifo i itu uma o le atunuu.
E lata i le 6000 foma’i sinia na alu a latou savali e faaalia pea o latou lagona lē fiafia ma le tetee atu i feutaga’iga ia latou totogi e pei ona faaauau mai le talanoaina; aemaise o le tele o totogi ua toe faaitiitia mai le totogi sa iai a o lea e feagai auaunaga o le soifua mālōlōina ma faafitauli o le aga’i ese o tagata faigaluega.
I faamatalaga i ripoti mai le leitio faavaomalo a Niu Sila, e ta’ua ai e silia ma le 18,000 togafitiga, 3,600 feiloa’iga ma foma’i faapitoa, ma le 7,000 o feiloa’iga lona lua poo follow-ups ma le 800 o togafitiga o ma’i tausāvali ua lē faataunuuina po ua toe tolopō ona o nei tetee.
I le amata faatino ai o lea solo tetee ua upuia e le alii Minisita o le Soifua Mālōlōina ia Simeon Brown le solo tetee.
Ta’ua e le alii minisita i lona iloa o tagata faigaluega a le malo e matua’i lelei lava totogi a o lenei ua savavali ese; ma e ofo i le mafai ona aga’i ese a o lea e moomia e gasegase le fesoasoani ma togafitiga.
Faaopoopo Brown, o lea foi o loo faatino fetuuna’iga ma talanoaga a le Health NZ ma le Employment Relations Authority; ma ua alu le tausaga o taumafai ona maua se tasi i nei matāupu.
E mau eseese lava tagata gasegase poo ma’i i e tusa ai ma lenei matāupu, o isi ua o latou tuuaia le malo i le lē lava o tupe e faamatuu mo lea auaunaga, ma o lea ua o latou tumafai e tuuaia na foma’i i nei feseeseaiga uma a o le tonu lava o i latou o le malo.
Faaalia e le tasi o gasegase mai Ueligitone, e aafia i le kanesa, na ia ta’ua e na te lagolagoina tagata faigaluega o le soifua mālōlōina, i latou o foma’i ona ua tele tele taimi a lenei malo e agai i lafoga ae lē ave le faamamafa e taumafai e ave le fesoasoani i tagata faigaluega a lea auaunaga.
I le faasolo ai o le solo tetee mo le lona lua o aso, ua faamauina o loo tatala pea falema’i mo gasegase tausāvali ma ē o moomia le vave vaai mo togafitiga poo emergencies peita’i o le tele o fuafuaga ma polokalame i falema’i ua lē mafai ona faatino.
