O le aso ananafi lea na taunuu ai i Samoa nei le Sui Palemia a le Malo o Niu Sila, Hon Carmel Sepuloni e fai ai ma sui o le Malo ma ona tagatanuu e molimauina le faamanatuina ai o le 61 tausaga talu ona Tutoatasi le Malo o Samoa.

I ni faamatalaga mai le National Tribune na ta’ua ai e Sepuloni le tāua o le auai ai o lona Malo i lenei faamoemoe.

“O loo iai le sainigalima faapaaga ua autausagā a le Malo o Niu Sila ma le Malo o Samoa.

“O Samoa o le atunuu muamua lenei o le Pasefika na maua lona Tutoatasi, ona o a’u o se tamafanau a Samoa o lenei vaega e le mafai ona galo ia te au.

“E tele ni vaega o loo galulue ai Malo e lua auā lava le atina’eina o ona tagata ma e lē mafaitaulia vaega o loo faipaaga faatasi ai.”

O le po anapo lea na faia ai se faatasiga i le Maota o le Hai Komesina a Niu Sila i Samoa nei ma na auai ai le Afioga i le Palemia Fiame Naomi Mataafa.

O le asō lea na asia ai e le Sui Palemia le Afioga i le Ao Mamalu o le Malo o Samoa Tuimalealiifano Vaaleto’a Sualauvi II ma o le a auai ai foi i sauniga o le faamanatuina o le Tutoatasi i le aso a taeao.