E le’i manuia le taumafaiga a le Manu Sina i le la taaloga faai’u o le latou pool, lea na taaalo ai ma le ‘au a le Iunaite Setete o Amerika, i York i le Aso Toonai talu ai.
O ‘ai o le taaloga, e 60 le USA ae le’i tau ’ai le Manu Sina.
E ui lava la i lea faia’ina a’ia’i mo le ‘au, ae na faaalia lava le taaalo finau o teine o le ‘au.
Ma sa viiviia lava le tama’ita’i kapeteni o Sui Pauaraisa lana ‘au e faapea, sa matuā taaalo malosi ma finau malo tama’ita’i uma, ma o lona mitamitaga lea, ona e le’i faavaivai le ‘au i le tulaga na iai sikoa a le isi ‘au, ae sa finau lava se’ia oo ina faai’u le taaloga.
Saunoa foi le faia’oga o le ‘au, Mataafa Ramsey Tomokino, e lē faigofie le i’uga o le taaloga ae e telē se aogā mo latou.
O le ‘au a le USA o se tasi o ‘au maualuga ae mo matou ua matou maua ai se avanoa e a’oa’o mai ai mai ia i latou.
Sa matilatila i lea taaloga le taalo malosi a le tama’ita’i o Taytana Pati Ah-Cheung, faapea le tama’ita’i o Madisen-Jade Iva, sa malosi lana talpuipui faatautee mai ma le malosi o le pu’e.
Fai mai Harmony Vatau, o le mafaufau o loo taalo mo o latou aiga ma lo latou atunuu, o le puna lena o lo latou malosi e oo lava i taimi sili ona faigatā o le taaloga ma le latou iai i le taamilosaga.
Ua mae’a nei la taaloga a le ‘au a tama’ita’i Samoa, le Manu Sina mai le latou pool, ma e lea se latou malo, o lo latou mitamitaga sili, sa maua se avanoa e taaalo ai e fai ma sui o o latou tagata, ma faataatia ai foi ni faavae lelei mo isi tama’ita’i o le a aga’i mai e fai ma sui o le ‘au i le lumana’i.
