Ua lipotia mai nei le faalauiloa ai e le malo o le tuuina atu o le $4 miliona tālā Niu Sila i le amatalia ai o se polokalame e iloilo ma su’esu’eina ai fanau o le Vasega 2 poo le Year 2 i matāupu tau matematika. 

Na ta’ua e le Minisita o A’oga, ia Erica Standford, o fuafuaga ua faataatia nei e le malo, e lē gata o le a faamatuu le 4 miliona mo su’ega i matāupu o le matematika i fanauiti, ae o le a vaaia le faamatuu atu o le $56 miliona mo le 143 o faia’oga o le a nafa i le na o le tuu atu o lo latou tau’au fesoasoani, ina ia a’oa’oina lelei fanau i le matāupu o le matematika. 

Ma le oo atu i le $40 miliona o le a sasaa atu mo ē o le a faia le faiva o le fesoasoani i lea lava matāupu i tua atu o taimi a’oga, poo le tutoring o le 34,000 o tamaiti a’oga o le Vasega 7 aga’i i le Vasega 8 i tausaga ta’itasi. 

Ae ui i se matagofie o seleni ua faamalaulauina mai e le Minisita o le Matāgaluega o A’oga, o loo molimauina le lē autasi ai o lenei fuafuaga ma finagalo o nisi o ulua’oga o le atunuu. 

I le latou tilotilo e ma’umau le taimi, i lona faauigaina, ua fai lava nei su’ega ma le agaga ia tau lava ina faataunuu, ae lē o iai se uiga i le faatinoina. 

Na faaleo e ulua’oga, o loo iloa lelei e faia’oga vaega ma itu e moomia ai e le tamaitiiti le fesoasoani.

Na māua iai foi talitonuga o le ‘au su’esu’e, o le tele o su’ega e faia e tamaiti, o le a tele ai faafitauli i le faalogoina ai e le tamaitiiti o le fefe ma le mā i le su’e soo. 

O le naunauta’iga a le malo, e pei ona faailoa e le tamaitai minisita ia Erica Stanford, ia maua ni faamaumauga maumaututū o fanau a’oga ma le tulaga o iai a latou taumafaiga.

Ma o nei fuafuaga o le a fesoasoani tele i le alualu i luma o tulaga o a’oa’oga a fanau.

Puna o Faamatalaga: https://www.rnz.co.nz/news/national/560783/we-re-testing-for-testing-s-sake-new-maths-tests-fail-to-make-the-grade-for-principals