Ua faia nei moliaga o le alii gaoi lea na ulufale i le fale o se aiga, fai lelei ai sana taumafataga faato’ā sola ese ai i le taavale a le aiga.
Ua lipotia i le 9News na ulufale atu lea alii i le faamalama o le fale i Pakington St i Kew i le vaveao o le aso 6 o Aokuso, na ia gaoia seevae, o se ato, telefoni feavea’i, ave ma le ki o le taavale a le aiga, taumafa ma muffins sa i le umukuka ma sola ese ai i le taavale a le aiga, o le Toyota Landcruiser 2018 e pei ona faailoa e leoleo.
Fai mai le lipoti e 28 tausaga ma e lē iloa se tuatusi i lona igoa ae na pu’eina e leoleo ma molia i moliaga eseese o le gaoi.
Fai mai e lei maua le taavale ae ua toe tatala i tua le alii lea e faatali ai le aso 1 o Novema e toe tula’i ai i le faamasinoga.
Puna o Faamatalaga: https://www.9news.com.au/national/man-steals-car-eats-muffins-kew-melbourne/0cc16ece-1fc8-4084-bfdc-c37b53ad88c0
