O le Aso Toonai o lenei vaiaso o a taeao lea i Samoa o le a avea o se aso e galulue uma ai tagata o nuu ma afio’aga e faatino le galuega o le faamamā o laoa ma maota ma le fanua, ina ia puipuia le atunuu mai le faama’i fiva o ponaivi ua pesia ai Samoa ma nisi o motu o le Pasefika.
Ua ave ai nei le tuualalo a le ta’ita’i o le malo i le Palemia i le pulega mamalu a alii ma faipule o nuu ma afio’aga, ina ia galulue mo le faamamāina o le atunuu atoa.
Ua taofia lē tumau le galuega o le fanaina o nofoaga o loo nonofo ma tuufua ai namu ae se’i faia muamua le galuega faamamā i le aveese o le lapisi ma otaota ma soo se laau e pei o le fala teu fanua e fiafia tele namu e nonofo ai.
O le lua vaiaso ua mavae sa faatino ai foi lea galuega i le atunuu atoa.
