Ua faailoa e le Komesina o faigāpalota le afioga Toleafoa Tuiafelolo Alexander John Stanley, e mafai i aiaiga o le tulafono o faigāpalota ona molia se tagata e faafaigaluega i le faia o se palota pe afai e tuua’ia i ni gaioiga ua lē talafeagai ma le faatinoina o ona tiute.
O le finagalo o Toleafoa sa ia faailoa i tusitala ina ua fesiligia i mafua’aga o le lē faitauina i le po o le Aso Faraile ua mavae, o le aofa’i o palota mai ni falepalota se fā i Savaii, lea na taunuu i le ofisa lē tumau i Tuanaimato pusa palota ua loka faatasi ai ma pepa o loo iai faamaumauga o le aofa’iga o palota.
Na faato’ā mafai ona talai ma siaki ma toe faitau ia pusa palota i le Aso Gafua na amata ai le faitauga aloa’ia.
O se tasi o matāupu sa fesiligia ai e tusitala le Komesina o faigāpalota, o ni sui tauva se to’afā o le vaega faaupufai o le Faatuatua i le Atua Samoa ua Tasi na oo atu le isi i le nofoaga o loo faia ai le faitauga o palota i le Aso Sa, ae o isi na aga’i i le nofoaga i Tuanaimato i le Aso Gafua.
Le afioga Toleafoa Tuiafelolo Alexander John Stanley o le Komesina o faigāpalota.
