Ua i aao nei o leoleo mo su’esu’ega le tagi ua faaulu e le afioga i le Palemia o le malo tausi le afioga Fiame Naomi Mataafa, faasaga i le ta’ita’i o le vaega faaupufai o le Faatuatua i le Atua Samoa ua Tasi le susuga i le Laaulialemalietoa Polataivao Leuatea Polataivao Fosi Schmidt.

O le tagi ua tuua’ia ai le ta’ita’i o lea pati faaupufai i lona faia o ni saunoaga taufaasesē ma le taufaaleaga faasaga i le Palemia ma sona aafiaga i le maliu o le tamaita’i polofesa o Caroline Sinavaiana Gabbard, e pei ona i luma o le Faamasinoga Maualuga lea gaioiga solitulafono o loo molia ai le tama’ita’i tusitala o solo ma talafatu le susuga Papalii Sia Figel o loo nofo taofia pea i le vaaiga a leoleo i le falepuipui i Tafaigata e faatali ai le aso e su’esu’e ai mau a leoleo.

Sa aofia ai foi i lea saunoaga ma se tuua’iga i le natia e le Palemia o le tagata na lavea ai ma maliu le alii talavou o Tuuau Faasavalu.

Le susuga Laaulialemalietoa Polataivao Leuatea Polataivao Fosi Schmidt.

O le feiloa’iga a tusitala ma le tama’ita’i Palemia sa ia faamaonia ai le tuuina atu o lana tagi i leoleo.

Le Palemia o le malo tausi afioga Fiame Naomi Mataafa.