Ua faailo popolega a foma’i i le faatetele ai o le numera o tagata ua autovaa atu i le falema’i, ua faata’otolia foi mai le faama’i o le tale vivini i le to’ele o itumalo o le atunuu, e pei ona iai faaitu o le Bay of Plenty ma Lakes.
I le maualuga ai o le numera o tagata ua aafia i le tale vivini, ua fautuaina malosi ai e foma’i tagata ina aga’i e faia a latou tuipuipui mo i latou uma ua agavaa ona fai tui.
I lipoti mai le Newstalk ZB, ua silia ma le 300 tagata ua faamauina le aafia i aai o Bay of Plenty ma Lakes, talu ona faamaonia mai ai e le Matāgaluega o le Soifua Mālōlōina le pepesi ai o le faama’i i totonu o Niu Sila i tausaga talu ai, ma le silia atu i le 30 o tagata ua taofia i maota gasegase ona o le malosi o aafiaga mai le faama’i.
Faamauina i se pepa o faamatalaga mai le Health New Zealand le telē o popolega a foma’i mo fanauiti poo paediatricians i nai tinā ma’itō, o pepe faato’ā fananau mai, aemaise o aiga Maori; o loo matua’i aafia lava i le tale vivini.
I faamaumuaga, le to’atele o nai fanuiti poo pepe o loo taofia i le falema’i mo togafitiga faaauau a foma’i ma tausi soifua.
Na faamanino foi e se tasi o foma’i mai Rotorua, ia Dr Danny de Lore le maualuga o aafiaga o fanau o loo tupu ma ola a’e i aiga e le’i faia pe maualalo foi le numera o i latou e le’i faia ni tuipuipui.
Ua ia fautuaina malosi aiga ma tagata nei ina ia faia nei loa o latou tuipuipui, ina ia mafai ai e o latou tino ona tatali aafiaga o le faama’i.
Ua faamanino foi e le Health NZ e leai se tulaga e ono faapopoleina ai i latou i le vailaau mo tuipuipui, ma e mafai ona fai e aunoa ma se totogi.
Puna o Faamatalaga: https://www.newstalkzb.co.nz/news/health/bay-of-plenty-doctors-urge-whooping-cough-immunisations-following-hospitalisations/
