Ua fautuaina e se foma’i tagata lautele o le atunuu ina ia mautinoa le mata’itūina lelei o lo latou saogalemu faalesoifua mālōlōina pe a o fuafua le malaga atu i atunuu o le Pasefika emaise atunuu ua faamaonia le aafia i le fiva o ponaivi poo le dengue fever.
O le faaiuga o le vaiaso na te’a nei na faamaonia ai le iai o le aafia o le Atu Kuki i le faama’i.
Ma ua faaopoopo atu ai nei i le numera o atunuu ua faamaonia ai le pepesi o le fiva o ponaivi, e aofia ai Samoa, Tonga ma Fiti.
Ua faamauina foi le aafia ai o nisi i le Tasman i faaitu o Townsville ma Cairns i Kuiniselani, Ausetalia.
O le masina na se’i mavae atu nei na fano ai le ola o se tamaitiiti e 12 tausaga le matua i Aukilani, ona o aafiaga o lenei faama’i, e pei ona aumai faatopetope mai Samoa e taumafai e togafitia i Niu Sila nei.
Ta’ua e fomai ia Marc Shaw e tatau i tagata Niu Sila o loo fuafua e malaga i atunuu i fafo ona faamautinoa lelei le faia o tuipuipui ma ia faatino uma vaega e puipuia ai i latou mai le ono aafia i le faama’i o le dengue fever.
I Niu Sila lava ia e to’atasi lea na faamaonia le aafia i nai vaiaso ua tuana’i, e le’i toe maua se isi faamatalaga e tusa ai ma ē na faafesoota’i ai sui o le Soifua Mālōlōina po ua aafia pe leai, ona o i latou nei na masalomia sa fesoota’i atu i lē o loo aafia.
Puna o Faamatalaga: https://www.rnz.co.nz/news/national/562046/pacific-dengue-cases-surge-but-don-t-cancel-your-holiday-yet-health-expert
