E lē tau faailo tulaga mata’ina o laufanua ma le lauiloa o matāfaga o faaitu i Mātū o Aotearoa nei, ae pagā lea ua tauau ina mou atu le matagofie talu ai le tele na’uā o soligatulafono e tutupu mai i Northland.
I le tausaga nei lava ia ua faamauina le oo atu i le 9 matāupu, o le fasioti tagata se’i tulou, ua maualuga atu lea nai lo o le tausaga ua tuana’i.
Talu ai le faatupula’ia o ia soligatulafono, o lea ua faaopoopo ai galuega mata’itu a leoleo, e pei ona māua i faamatalaga, e silia ma le to’aivasefulu malu o le malo mai vaega uma o le atunuu ua faasolo a latou petolō i nofoaga o loo maitauina ai le tele o soligatulafono e tutupu mai ai, poo hotspots e pei ona faaigoaina ai e leoleo.
E lē gata i lea, ae ua faasolo foi ona mata’ituina kegi, ma le faatautaia o le tele o matāupu o loo faasolo nei su’esu’ega.
Ae ua faaalia foi le to’aitiiti o le numera o nai leoleo o loo faatautaia galuega.
Ta’ua o le taimi nei e lē o gafatia e le numera o leoleo o loo iai nei lea galuega tele.
Ua faailoa ai foi o le ave ai o le faamuamua i lenei faamoemoe o le a faatuatuana’i ai le tele o isi foi soligatulafono.
E tusa ai ma sa’ili’iliga a se tasi o sui faasalalau na māua ai, o le tele o soligatulafono ma sauāga e amata mai lava i le limavaivai o tagata, o le tagofia o fualaau faasāina ma le leai o ni galuega a tagata.
Puna o Faamatalaga: https://www.rnz.co.nz/news/national/570236/northland-s-unprecendented-crime-surge
