A o faagasolo le fonotaga a atunuu o le Pasefika e sefululima i Samoa i lenei vaiaso e pei ona autū i le talanoaina o atina’e e siitia ai le ola a’oa’oina, le soifua mālōlōina ma le puipuia malu o fanauiti, ua faailoa lautele i le Upega Vaai a le faalapotopotoga o le Toomaga mo ē Puapuagatia, poo le SVSG Human Rights Watch, le siitia pea o le tulaga aafia o aiātatau o fanau i Samoa.

O loo fua lea tulaga siitia i ni matāupu ua tuuina atu ai nisi o fanau mai le 8 ma le 9 tausaga le matutua i le vaaiga a lea auaunaga tuma’oti i le atunuu, e pei ona faamautū ai i le apitaga o iai fanau sauāina le Campus of Hope i Tuanaimato.

O loo faailoa foi i le upega vaai a le Toomaga aafiaga o aiātatau a nisi o fanau mai le matutua e 13 ma le 14 tausaga e aofia ai se teineitiiti e iai aafiaga tumau, ma o le faamanatu lea ia Samoa aemaise o mātua, aiga, nuu ma Ekalesia, se’i silasila ane, ma silasila ifo i le aafiaga ua iai aiātatau faatagata soifua poo faamanuiaga faavae o nai fanau.

‘O Aiātatau faatagata soifua a Fanau, o lona uiga o le Aiātatau e ola ai i se si’osi’omaga poo se aiga saogalemu, alu i le a’oga, soifua mālōlōina lelei, ma isi tulaga talafeagai.

E ioe le faalapotopotoga e lē TUUSA’OLOTO Aiātatau a fanau, ae o le tiute o mātua e mafai ai ona puipuia lelei ia Aiātatau.