Ua faalauiloa mai nei le toe faaopoopo ai o le isi 2 tausaga i le konekarate a le alii taalo o Wallace Sititi i totonu o Niu Sila ma faaauauina ai lona taalo mo le ‘au a le Matai poo le Chiefs.
O le alii o Wallace na ofi mai i totonu o le taamilosaga o le Super Rugby Pacific i le tausaga na te’a nei, ma o sē ua molimauina e le to’atele le mata’ina o lana taalo.
Ma i le maoa’e o ana taumafaiga talu ona amata taalo i taaloga faitaulia ma taaloga faapolofesa na i’u ai lava ina avea o ia ma se alii alualu i luma ma maoa’e lana taalo i le lakapi i le lalolagi, i le vaega ua ta’ua o le World Rugby’s Breakthrough Player of the Year.
Na ta’ua e le alii o Wallace, ‘o loo ia te ia le naunauta’iga e faaauau ai pea lona taalo mo le ‘au a le Chiefs’.
Na ia faamatala e tauala mai le leitio faavaomalo a Niu Sila, o lona lava iloa e fetaui lelei mo ia lona faatinoina o le taaloga ma le ‘au.
Na faaopoopo mai Wallace, e tele pea vaega e moomia ona ia a’ao’oina mai le taaloga, ma e manatu o Niu Sila ma le ‘au a le Chiefs lava le tali mo le saga faamausalī ai o lona malamalamaga i le taaloga lakapi.
O loo laumanu’ia le filifilia o le alii taalo Samoa mo le ‘au a le Matai i le la taaloga ma le Moana Pasefika i le faai’uga o lenei vaiaso.
Puna o Faamatalaga: https://www.rnz.co.nz/news/sport/561522/rugby-wallace-sititi-signs-on-for-two-more-years
