I le to’alua o sui tauva mo le filifiliga a le itumalo faapalota o Gagaifomauga 3, o lea ua faatumau i le faai’uga a le faamasinoga o palota le avea ai o le sui tauva tama’ita’i mai le vaega faaupufai e puipuia aiā tatau a tagata, le afioga Faaulusau Faatoatoa Rosa Duffy Stowers ma se tasi e tauva mo le nofoa o le itumalo ina ua aumai le i’uga a le faamasinoga i le lu’i sa tuuina atu e le susuga a le Laaulialemalietoa Leuatea Polataivao Fosi o le ta’ita’i o le vaega faaupufai o le Faatuatua i le Atua Samoa ua Tasi.
Sa finauina i le lu’i le le faamalieina o le agavaa i aiaiga o le monotaga o matai e to’alua o le nuu o Aopo, sa la faamaonia le avea o Faaulusau Rosa ma sui tauva mo le faigā filifiiga a lea itumalo.
I le faai’uga ua taoto iai lea tagi ua faailoa ai e le faamasinoga o palota e ui ina lē faamalieina aiaiga o le monotaga a matai e to’alua na faatūtū iai tuua’iga peita’i o le sui tauva e lē o fesiligia lona agavaa e avea ai ma se tasi e faia iai le filifiliga a le itumalo, ona sa avea ma faipule o le Palemene ma sa agavaa foi ona tauva i le palota tele o le tausaga e 2016 ma le 2021.
I le lu’i sa faaulu e le afioga Tuala Toiaivao Tevaga Iosefo Ponifasio o se sui tauva mo le vaega faaupufai o le Samoa ua Potopoto mai le itumalo palota o Gaga’emaua 1, faasaga i le agavaa o le sui tauva o le Faatuatua i le Atua Samoa ua Tasi le tofa Vaaaoao Salumalo Alofipo.
O monotaga faalenuu foi a matai e to’alua na faamaonia le avea o Vaaaoao ma sui tauva sa fesiligia ai.
O le finauga e le’i atoa le 3 tausaga o le monotaga a ia matai e to’alua, peita’i e le’i faamalieina le faamasinoga i mau sa tuuina atu e le itu tagi ma faalēaogāina ai le lu’i lea ua faatumau ai ona avea le tofa Vaaaoao Salumalo Alofipo ma sui tauva o Gagaemauga 1.
