Poo ā fesuia’iga o pulegamalo a Samoa e lua ma eseese foi le faagaioiga o faigāmalo a Samoa Tuto’atasi ma Amerika Samoa, ae lē mafai ona vavae ese ai sootaga o tagata auā o le atoa o Samoa e amata mai le tai samasama o le Tuimanu’a se’ia pā’ia fili ma puletuu na tauilo ai malo.
O le agaga faagaeetia lea o le afioga i le Palemia o le faigāmalo fou a Samoa le susuga Laaulialemalietoa Leuatea Polataivao Fosi Schmidt i sona finagalo i le feiloa’iga ma tusitala i le Aso Lulu o lenei vaiaso, e faafetaia ai le Kovana Sili o le faigāmalo a Tutuila ma Manu’a, afioga Pulaali’i Tuiteleleapaga Iuli Nikolao Pula ma lona faletua, o le Pelesetene o le Senate, afioga Tuaolo Manaia Fruean ma lona faletua, faapea le Fofoga Fetalai o le Maota o Sui, afioga Savali Talavou Ale ma lona faletua, ona o le tali faaaloalo i le auai lea i le sauniga na tatala ai le paea’iga 18 a le Palemene o le Malo Tuto’atasi o Samoa, faapea le faatautoina o sui usufono filifilia o itumalo e 51, aemaise o le faatautoina o le Palemia ma lana auvaa o Minisita o le Kapeneta.
Sa feiloa’i le Palemia ma le Kovana Sili faapea le Pelesetene o le senate ma le Fofoga Fetalai o le maota o sui o le fono faitulafono a Amerika Samoa a o le’i toe taliu le faigāmalaga mamalu i le teritori.
Le afioga i le Palemia susuga Laaulialemalietoa Leuatea Polataivao Fosi Schmidt.
