E ui e le’i maua mai se faai’uga tusitusia a le Faamasinoga Faaitumalo na toe faitau ai palota o faigā filifiliga a itumalo e sefulutasi, ae ua manino i nisi o lipoti a nisi o auaunaga faasalalau i lo tatou atunuu, o loo tumau faai’uga o le faitauga aloa’ia na faatino e le Komesina ma le ofisa o le komisi o faigāpalota i itumalo e sefulutasi lea o le sefulu o faai’uga e mai itumalo na talosaga ai sui tauva o le vaega e puipuia aiā tatau a tagata, o nisi sa maua le tulaga tolu, faatasi ai ma le itumalo o Aana Alofi 3 e 423 palota e mamao ai le manumālō o le sui na manumālō ma le sui sa talosaga mo se toe faitauga o palota i le faamasinoga.
O se lipoti a le vaega faasalalau o leTalamua o loo faailoa ai se vaega o le faai’uga a le faamasino o le Faamasinoga Faaitumalo le afioga Mata’utia Raymond Schuster sa feagai ma nisi o talosaga o loo ia faailoa ai, sa tatau i ofisa loia na tuuina atu ia talosaga ona iai le faamaoni, tuto’atasi ma ia le pito tasi le silasila.
O talosaga sa faasino iai lea finagalo o le afioga i le faamasino na faato’ai atu mai itumalo faapalota o Alataua i Sisifo, Aana Alofi 3, Faasaleleaga 5 ma Faasaleleaga 1.
