Ua faaauau ona tuli le faasalaga e iva tausaga i le falepuipui o Ta’ala Tiasi Ta’ilo i le faamaonia o lona moliaga o le fasioti tagata pa’ivalea, ina ua teena e le Faamasinoga o Talosaga a le Faamasinoga Maualuga lana talosaga apili e toe iloilo lona faasalaga na faia e le Faamasinoga Sili lea na amata le fua i le 12 tausaga ae na taunuu e tuli le iva tausaga ae toesea tausaga e tolu ona o itu lelei faasino i lē ua molia.
Ua faaalia e le Faamasinoga o Talosaga i lana faai’uga o le 3 tausaga na toesea o se faailo o le alofa o le faamasino na faia le faai’uga ae ana o se isi faamasino e na o le 12 masina e toesea pe a fua i le ogaoga o le solitulafono ma le faaaogā e Ta’ala o lana taavale o se ‘au’upega e faaoo ai manu’a tugā i lē na fano le soifua i le solitulafono.
O le isi itu i le silasila a le faamasinoga sa aafia foi le ‘avamalosi i le taimi na faatino ai le solitulafono.
O lē na molia sa iai se feeseesea’iga sa aafia ai ma lē na maliu a o tagofia le ‘avamalosi, ma sa alu ai lē ua molia i lana taavale o le ituaiga o le RAV4 ua so’a lē ua maliu a o savali i le aualatele.
Sa ia toe faasolomuli le taavale ma taia ai se vaega o le tino o lē na aafia, ma o le ogaoga o manu’a na mafua ai ona maliu Raymond Taituave.
