O le masina fou o Oketopa i le aso 15 ua faatulaga e fofogaina ai mo le valaauga muamua poo le first mention, tagi e valu ua faaulu i le faamasinoga e māfua mai i ni aiaiga o le tulafono o faigāpalota o le tausaga 2019, ua solia e sui sa tauva ma manumālō i le palota tele.
E to’atolu minisita o le Kapeneta, o le Fofoga Fetalai o le Palemene ma se Minisita Lagolago o loo molia ai.
O itumalo e valu o loo aafia i ia tagi o Aiga i le Tai, Falealili 1, Safata 1, Faasaleleaga 5, Faasaleleaga 3, Faasaleleaga 2, Falealili 2 ma Vaimauga 2.
E fā tagi ua faaulu e sui sa tauva mo le fu’a a le vaega faaupufai e puipuia aiā tatau a tagata, 3 tagi ua faaulu e sui sa tauva mo le pati faaupufai o le Faatuatua i le Atua Samoa ua Tasi, ma le tagi ua faaulu e le sui tauva tama’ita’i sa tauva faatuto’atasi mai le itumalo o Falealili 2.
O le afioga Mulipola Leiataualesā Leiataualetauā Laki ua ia molia le sui na manumālō mai le filifiliga a Aiga i le Tai le tofa Auapaau Mulipola Aloitafua Mulipola.
O Tuiloma Tusa Laniselota Lameko ua ia molia le sui sa manumālō le afioga Toelupe Maoiautele Poumulinuku Onesemo i Falealili 2.
O le afioga Leaana Ronnie Mulitalo Posini sa tauva i le faigā filifiliga a Safata 1 ua ia molia le sui faipule tama’ita’i le afioga Seve Anapu Te’i Fuimaono.
O le afioga Peseta Vaifou Tevagaena ua ia molia le sui faipule ua seei nei i le nofoa o Faasaleleaga 5 le afioga Vui I’iga Sione I’iga.
O le afioga Tamaletā Taimang Jensen ua ia molia le sui faipule ua toe filifilia o Vaimauga 2 le tofa Lenata’i Victor Faafoi Tamapua.
O le susuga Papalii Li’o Oloipola Ta’eu Masipa’u ua ia molia le sui na manumālō ma ua seei i le nofoa o le itumalo o Faasaleleaga 3 le tofa Namulauulu Papalii Leota Sami Leota.
O le afioga Magele Sekati Fiaui ua ia molia le sui na manumālō i le filifiliga o Faasaleleaga 2 ua avea nei ma faipule le tofa Vaaelua Senetenari Samau.
O le afioga Fuimaono Maria Tuatagaloa Meredith ua ia molia le sui ua toe manumālō i le tofi faipule o Falealili 2 le afioga Fuimaono Maiava Tito Asafo.
O ia tagi e valu na faauluina uma i le faamasinoga i le Aso Faraile na te’a nei na mae’a ai le sefulu aso mai le aso o le faai’uga aloa’ia o le palota tele e faato’ai ai ni talosaga poo ni tagi o ni tuua’iga o solitulafono na tutupu i le taimi o le faigāpalota aoao a Samoa.
E lima aso ua tuu avanoa ai le faamasinoga ia i latou ua molia e tapena atu ai sana foi tagi pe afai e iai ni tuua’iga faasaga i le sui ua ia muamua faatō’ai le tagi.
Ua mae’a foi ona faailoa e le afioga i le Faamasino Sili le afioga Satiu Simativa Perese le ta’iala ua saunia e le faamasinoga mo le tapenaina atu o tagi a o le’i fofogaina mo le valaauga muamua.
