E 35 ni tusi faataga mai faamasinoga poo search warrants na faatino ai se sa’iliga ma su’esu’ega a leoleo i ni fale ma nofoaga i le tele o faaitu o Tauranga e aofia ai ma se nofoaga a le vaega poo le kegi ua faaigoaina o le Greazy Dogs MC.
I se pepa o faamatalaga mai le ofisa o leoleo, na faamanino mai ai le taofia o nisi o sui sinia o le kegi ma le sui peresitene o lea vaega.
Ta’ua foi o lenei galuega tele o se mataupu na amata galulue ai le vaega o Organised Crime Group a le atunuu mai le tausaga na te’a nei 2024 ma na amata faatulaga ma faaigoaina ai lea galuega tele o le Operation Kingtide.
Ma i le faasologa o su’esu’ega na māua ai o lenei kegi poo gang le Greazy Dogs MC o loo faatautaia atoa gaioiga o le avatu ai o fualaau faasāina, le pauta o le methamphetamine i itu Sisifo o Bay of Plenty e tauala atu i fale gaosi poo manufacture.
I le faatino ai o osofa’iga na maua ai e leoleo aupega malolosi poo fana, o ututau, o pauta faasāina o methamphetamine ma maruana, o vaialaau ma meafaigaluega e faaaogā e gaosia mai ai pauta faasāina; aofia ai ma se tino i tupe $25,000.
Faailo foi e le vaega o le Asset Recovery Unit a leoleo lo latou mauaina ma taofia o aseta, e silia ma le 1.5 miliona lona tau aofa’iga.
E aofia ai fale e 2, taavale e 2 ma pasika e 3.
Faamaonia foi le faaauau ai ona faia o sa’iliga a leoleo e tauala atu i tusi faataga i lenei vaiaso, ma o loo iai foi lo latou talitonuga i le iai o nisi o le taofia ma molia i le tulafono.
I lipoti e tusa ai ma i latou ua molia ma taofia – o le tasi o alii e 25 tausaga le matua mai Tauranga, o le isi o se alii e 33 tausaga le matua mai Mt Maunganui, o le tasi e 37 tausaga le matua mai Tauranga ma alii e to’alua e ta’i 34 tausaga le matutua – o le tasi mai Mt Maunganui ma le isi e mai Papamoa.
Ua molia uma i le moliaga o loo aofia ai le “auai i vaega solitulafono tuufaatasia faalilolilo” i lona faaperetaniaina – “participating in an organized criminal group”, o le umiaina o pauta faasāina ma le naunauta’iga e tufatufa atu, poo le offering to supply methamphetamine, possession of methamphetamine, possession of methamphetamine for supply, and conspiring to supply cocaine.
Puna o Faamatalaga: https://www.police.govt.nz/news/release/arrests-assets-restraints-following-police-operation-targeting-greazy-dogs-mc
