I le aso 29 o Me na saofia ai le sola’aga mai le falepuipui i Tanumalala a pagota o Lauititi Tualima ma Aniseko Vaelei, lea na toe maua i le aso 3 o Iuni, o le su’esu’ega a le matāgaluega o leoleo i le mafua’aga, ua faasala ai leoleo falepuipui e to’avalu.
O le to’atolu ua faatete’a ma le galuega, to’atolu ua suia o latou tulaga poo ranks, ae to’alua ua faamālōlō lē tumau mo le 2 vaiaso e lē maua ni totogi.
O le sola’aga a Lauititi i le masina o Fepuari o le tausaga nei e iai foi leoleo falepuipui poo prison guards na faia iai faasalaga ona o le faatamala i o latou tiute na mafua ai lea sola’aga a lea pagota, lea na toe sola foi i tua i le masina na te’a nei o Me faatasi ai ma le isi pagota o Aniseto Vaelei.
O le vaiaso nei sa tutula’i ai i la’ua i le faamasinoga ma o la ioeina moliaga o le sosola ma le falepuipui ma le moliaga o le talepe o le loka o le sela numera 6, ma sa la talepe foi le fā’alo o lea sela poo le potu sa faamautū ai.
Ua faaalia e le Komesina o leoleo, falepuipui ma le toe fuata’ina le tofa Auapaau Logoitino Filipo i le nusipepa o le Samoa Observer, o leoleo falepuipui e to’atolu ua faamālōlō mai le galuega sa tiute i le po na alu ai le sola’aga a Lauititi ma Aniseko.
