O le Aso Faraile o le vaiaso o muamua nei le aso 4 lea o Iulai o le a faauu ai le vasega fou o alii ma tamaitai ua ofoina o latou soifua e auauna ma tautua ai i le Matāgaluega o leoleo, falepuipui ma le toe fuata’ina.
O le aofa’iga o i latou e 67, lea e to’a 47 o leoleo poo malu o le malo ua aofia ai tamaitai e 27 ma alii e 20.
O le isi 20 o alii foi ua ofo e galulue o ni leoleo o le falepuipui.
O le vaiaso ua mavae na faataunuu ai se tasi o vaega tāua o le faia o tautoga lea sa faatino i le faamasinoga mo i latou uma o lea vasega, a o sauni ai e faauu ma amata ona galulue i le matāgaluega.
Ua faailoa e le Minisita o le malo tausi mo le matāgaluega o leoleo falepuipui ma le toe fuata’ina le afioga Faualo Jeffrey Harry Schuster, i le upega tafa’ilagi a le pati faaupufai o le Samoa Ua Potopoto, ua lē taunuu se tasi o fuafuaga a le malo sa taoto i le tala o le tupe ua teena e le Palemene, o le siitaga lea o totogi mo alii ma tamaitai leoleo.
Ae mo le silafia o se tasi o tapenaga a le malo sa fuafua e faatino a o le’i mae’a le paeaiga 17 a le Palemene, o le toe tuueseese o pulega o galuega tau falepuipui ma le matāgaluega o leoleo, peita’i ua lē taunuu lea fuafuaga.
O Aperila o le tausaga e 2020 na pasia ai e le Palemene le tulafono na toe tuufaatasia ai le matāgaluega o leoleo ma falepuipui i le tuana’i o le lima tausaga o ese le pulega o falepuipui ese le pulega o le matāgaluega o leoleo.
