O le a taunuu lava ona faia le faigāpalota faavavevave a le atunuu i le aso 29 o Aokuso o le tausaga lenei 2025.
O le i’uga lea ua aumai i le asō e le faai’uga a le Faamasinoga Maualuga e tusa o le talosaga a le Komesina o faigāpalota e tauala atu i le tamaitai Loia Sili a le malo, sa talosagaina ai nisi vaiaso faaopoopo se 6 e tapena ai le faigāpalota a le atunuu.
Peitai o le faai’uga ua tuuina mai ina ia tausisia ai pea le aiaiga faaletulafono e tusa o le Faavae, e tuu mai ai le 3 masina e tapena ai se faigāpalota pe a uma ona faatā’ape aloaia le paeaiga a le Palemene.
E pei ona ta’ua i se lipoti o tala fou i le taeao analeila, o lea talosaga a le Komesina o faigāpalota, ina ia lava ai se taimi e tapena uma ai vaega eseese e moomia e le latou ofisa e pei o meafaigaluega aemaise totino uma o le a faaaogā mo le faatinoga o le faigāpalota i le aso ua atofaina.
O se talosaga sa finau tetee iai loia o loo fai ma sui o vaega faaupufai ua aloa’ia i le taimi nei, le Faatuatua i le Atua Samoa ua Tasi, le HRPP, le SNDP ma le Democratic Republic Party.
O le afioga i le Faamasino Sili, ma isi Faamasino sinia e to’alua o le Faamasinoga Maualuga, sa feagai ma le iloiloina o lenei talosaga, ma aumaia ai le latou faai’uga e pei ona ua iai nei.
