O le faamanuiaga tusitusia mai le Kovana Sili o Amerika Samoa sa tauaao e le ta’ita’i o le Malo ma le Palemia filifilia ae o le ta’ita’i o le vaega faaupufai o le Faatuatua i le Atua Samoa ua Tasi, a o lumana’i le tauaofiaga muamua a le paea’iga faapalemene 18 na faatauto ai sui usufono filifilia ma faatauto ai le Palemia susuga Laaulialemalietoa Leuatea Polataivao Fosi Schmidt ma lana Kapeneta, o loo faailoa ai e le Kovana Sili le afioga Pulaalii Nikolao Pula, e mautū pea sootaga o Samoa i gafa ma faiā, faapea le aganuu ma agaifanua ua masani ai Samoanalua, ae sili ona ganea le galulue soosoo tau’au ma fefaasoaa’i finagalo ma lagona auā se manuia o faigāmalo a Samoa i Sisifo ma Samoa i Sasa’e.
O se tasi o vaega o le faamanuiaga mai le Kovana Sili i le Palemia filifilia o Samoa o loo ia faaalia ai…
“Alo i luma lo tatou sa e sa’ili figota ma penina o le tai loloto auā le tapua’iga a le atunuu, ma ia faalautele pea e le Atua mānoa o lou fale’ie i le tino, ae sili i le agaga e tautua ai Samoa ma ona tagata uma. O le malosi o a ta faigāmalo e lua, E Faavae i le Atua Samoa, ae Samoa Muamua le Atua Amerika Samoa nei”.
O loo sainia le faamanuiaga e le Kovana Sili afioga Pulaalii Nikolao Pula, e avea ai ma sui o le Kovana Lutena afioga i le matua Pulumataala Ae Ae Jr faapea le Malo ma tagatānuu uma o Amerika Samoa.
