Ua faaalia faanoanoaga o pulenuu o faaitu o Palmerston North ma Horowhenua i se matāupu na tula’i mai i le vaiaso na se’i mavae atu nei, na aafia ai nisi o le mamalu o le atunuu.
O lea matāupu o se faalavelave na tula’i mai i Levin, o se tuuga taavale, ma o le taunuuga o nei tuuga na lavevea ai tagata e to’afitu.
Ua ta’ua e lipoti, e fai lava sina to’atele o tagata na iai i potopotoga e faatino tuuga nei, ma na oo atu ai lava leoleo e faata’ape.
E to’asefulu tagata na taofia ma saisai e leoleo i lea po, ma o le to’afitu na aafia e aofia ai ma ni malu o le malo se to’alua.
O tulaga mata’utia i lea matāupu, o le vaaia ai o taavale masalomia na auai i tuuga taavale ma le aafia ai o tagata ua faasalalauina ma ua faatau i le maketi i luga o upega tafa’ilagi.
Māua i lipoti a leoleo, o le tasi o taavale o loo lisi i luga o taavale faatau atu – o loo faailoa ai i ata le auai ai tauvaga faavivili pa’u; o le tasi e leai se WOF (Warrant of Fitness) e faailoa ai le saogalemu o le faaaogāina o lea taavale, ma e le’i resitala foi.
O nisi o taavale sa taofia faamalosi, pe sa impound muamua e leoleo.
O loo faasolo pea su’esu’ega a leoleo e tusa ai ma le faalavelave na tula’i mai i le vaiaso ua tuana’i.
Ma ua fautuaina ai e malu o le malo tagata lautele o loo tagai e faatau ni taavale mai i maketi eseese i luga o upega tafa’ilagi ina ia mata’itūina lelei tulaga uma o le taavale, ona o le ono aafia o nei aseta i ni soligatulafono, ae ia mautinoa lelei le fesili i ē o loo faatauina atu nei taavale i tulaga o le saogalemū.
Puna o Faamatalaga: https://www.rnz.co.nz/news/national/563253/cars-involved-in-violent-levin-street-race-sold-on-facebook-marketplace
