O laaumalosi, ututau, pauta ma laau faasāina e aofia ai le aisa ma maruana sa maua ma taofia e leoleo mai a latou su’esu’ega ma osofa’iga, ua faatama’ia uma i se galuega sa molimauina, e le Minisita o le Matāgaluega o Leoleo, Falepuipui ma le Toe Fuata’ina faapea sui o le ofisa o le komesina o Niu Sila ma Ausetalia i Samoa.

O le Aso Lua o le vaiaso nei na faia ai lea galuega sa faatama’ia ai laaumalosi o ituaiga eseese lea sa faaaogā ai se masini ua foa’i e le ofisa o le malo o Niu Sila i Samoa ma se masini mamafa.

Photos: Ministry of Police, Prisons and Correctional

O faamaumauga a le matāgaluega ua faailoa ai e 360 laaumalosi e aofia ai aupega e 77 na tuuina atu i le polokalame o le tuuina atu o fana solitulafono e aunoa ma ni moliaga.

E 1,635 pulufana poo ututau, 4 kilokalama o fuālaau faasāina e aofia ai le 42 tesimale 5 kalama o le aisa poo le methamphetamine, ae 3 tesimale 99 kilokalama o le maruana.

Ua faafetai ai le Matāgaluega o Leoleo, Falepuipui ma le Toe Fuata’ina i ana paaga totino o loo latou galulue faatasi e pei o leoleo o le malo Ausetalia, Matāgaluega o Tiute ma Tupe Maua, le nofoaga o su’esu’ega faasaienisi le SROS, Matāgaluega o Faamasinoga, pulega o le tineimu ma galuega lavea’i i taimi o faalavelave, faapea le vaega o femalaga’iga a le malo ma le ofisa o le Loia Sili.

O auaunaga uma nei sa galulue ma le matāgaluega o leoleo sa mafai ai ona faatino su’esu’ega ma osofa’iga na maua ai fuālaau faasāina ma maua ai ma laaumalosi ma ututau.