Ua mae’a le vaiaso ua mavae sa amata fofogaina ai nisi o tagi faasaga i agavaa o nisi o sui faatutū ma faai’uga a le Komesina o faigāpalota, ma ua tālia ai nei se faai’uga o su’esu’ega o le lu’i a le sui faatū ma le ta’ita’i o le vaega faaupufai o le Faatuatua i le Atua Samoa ua Tasi, Susuga Laaulialemalietoa Polataivao Leuatea Polataivao Fosi Schmidt faasaga i le sui tauva tama’ita’i mo le vaega faaupufai e puipuia aiā tatau a tagata le afioga Faaulusau Faatoatoa Rosa Duffy Stowers.
O loo autū lea tagi i le fesiligia o le agavaa o matai e to’alua sa sainia le pepa lesitala na faaulu ai le suafa o Faaulusau Rosa a o faagasolo le lesitalaina o sui tauva.
O le aso 15 o Aokuso e aumai ai lea faai’uga.
I le Aso Gafua o lenei vaiaso ua faatulaga mai o le a su’esu’e ai le tagi a le sui tauva o le vaega faaupufai o le Samoa ua Potopoto lea sa sē’ei i le tofi Faipule o le itumalo o Gagaemauga 1, le Afioga Tuala Toiavao Tevaga Iosefo Ponifasio faasaga i le agavaa o le sui tauva o le Faatuatua i le Atua Samoa ua Tasi le tofa Vaaaoao Salumalo Alofipo.
O le matāupu foi lea o loo faasaga i le faai’uga a le Komesina o faigāpalota.
O le Aso Lua o le vaiaso nei lava e su’esu’e ai le isi tagi a Tuala Toiavao Tevaga Iosefo Ponifasio faasaga i le Komesina o faigāpalota ma le agavaa o le sui tauva tuto’atasi le afioga Lauano Mulivai Lauano Pa’u.
O le Aso Faraile o le a su’esu’e ai le tasi o lu’i a le sui tauva o le Samoa ua Potopoto le tofa Leatinuu Wayne Sooialo faasaga i le agavaa o le sui tauva o le vaega faaupufai e puipuia aiā tatau a tagata le tofa Ulugia Elon Piliopo Betham.
O se tagi o loo molia ai foi le Komesina o faigāpalota.
O le Aso Lua o le vaiaso a xsau le tagi mulimuli o le a su’esu’e ai le lu’i a le afioga Valasi Luapitofanua Toogamaga Tafito Selesele mai le itumalo o Vaisigano 2.
O loo fesiligia i le finauga a lē sa sē’ei i le tofi o lea itumalo le agavaa o se tasi o sui faatū mo le faigā filifiliga a Vaisigano 2, le afioga Tagaloa Leilua Tupou Afa.
O loo molia ai foi ma le Komesina o faigāpalota.
O le Aso Faraile o le vaiaso asau e lau ai faai’uga uma o lu’i sa faaulu i le faamasinoga o faigāpalota, e aofia ai ma tagi ua toe ave i tua faapea tagi ua lē mafai ona su’esu’eina ona o finauga faaletulafono sa fesiligia ai le faaauau ma le lē faaauauina ona tagofia e le faamasinoga.
