Ua faailoa e le Minisita o Faatoaga ma Faigafaiva le susuga Laauli Leuatea Polataivao Fosi Schmidt, sona finagalo faasino i le 400 eka o fanua e pei ona sa fesili ai le taitai o le Itu Agai i le Palemene ma tali iai le Palemia.

Sa faaalia le finagalo o le afioga i le minisita i se fesili ona o se fesili a le susuga Tapuala o loo faafoeina le polokalame o le Soalepule e mafua, ona o loo laumanu’ia ai le suafa o le minisita o faatoaga ma faigafaiva.

Na toe faamautu ai e Laauli le tali a le Tamaitai Palemia e leai se fuafuaga faapea o le ave o se lisi e 400 eka mo se atinae lafumanu mo Amerika Samoa, ae o se mataupu na faailoa e Laauli o loo faatalatalanoa i le va o matagaluega o faatoaga a Samoa Tutoatasi ma Amerika Samoa, i le sini autu ia saili faiga talafeagai uma mo le manuia o tagata o Tutuila ma Manu’a ma tagata o Samoa Tutoatasi.

Ua faailoa ai foi e le minisita e iai ni manu papalagi ua foa’i atu mo le amata ai o se taumafaiga a le vaega o faatoaga i Amerika Samoa, ma o loo faatino lea atinae tau lafumanu i le Motu Sa poo le motu o Manu’a.

E lei faailoaina e le minisita pe fia ni manu papalagi ua ave, ae na ia saunoa o le tasi o taumafaiga o loo galulue faatasi ai o le itu i faigafaiva, e pei ona faameaalofa e le matagaluega o faatoaga ma faigafaiva a Samoa ni faisua e faafofoa i ogasami o Tutuila ma Manu’a.

O le 400 eka na faaalia e Laauli o se mataupu e faatalanoa i le Atoa o Samoa pe a feiloai taitai o Malo e lua.

“O lea ua tali iai le Tamaitai Palemia e leai se mea faapena o tupu.

“O sootaga lava ia a le matagaluega o faatoaga iinei ma le matagaluega o faatoaga a Amerika Samoa o faatalatalanoaga na sa faatalanoa ai fuafuaga alu alu mamao ae lei faataunuuina se mea.

“O le tulaga sa talanoa ai e oka faatasi povi mai Ausetalia ona omai lea ave latou povi ae tuu tatou povi iinei, o se fuafuaga e tufatufa ai le expenses cost.

“Ia mo le tuuaiga lea ua sau, poo ā lava tapenaga a le Senate ma fuafuaga a le latou Malo, o le taimi lenei e leai se fuafuaga faapena ua faamatuu se lisi o ni fanua e 400 eka”… se vaega o le finagalo o le minisita o faatoaga ma faigafaiva i le polokalame o le Soalepule.

O le tausaga nei na malaga ai i Amerika Samoa le minisita ma nisi o lana matagaluega e momoli faisua e 500 mo le fuafuaga e faafofoa i ogasami o le teritori.

A o iai i Samoa le usugafono a Amerika Samoa i le fono o le Atoa o Samoa i le tausaga na tea nei, sa latou asia le tasi o atinae a le matagaluega o faatoaga a faigafaiva o le nofoaga o loo faafofoa ai le limu i Toloa.

O se isi lea o taumafaiga o loo taulai foi iai fuafuaga a matagaluega e lua.